Heb 3 | MED | STEP | Na nga angmᵾn, wamp wingti kᵾⱡ ye! Enim Got ndi, i ku etpa, wi ropa titim wamp kᵾⱡ, enim pilik kai itᵾi! Jisas wu ei, nombuⱡa rung Wu Pris Kuimbal ei nga mbi paka rondpᵾn, mondᵾp pilpᵾn kᵾn, uⱡ kun kai mbᵾ tᵾp pena ila pindmin!

Hebrews 3

Jisas Ndi, Moses Tᵾpa Mana Ndurum

1 Na nga angmᵾn, wamp wingti kᵾⱡ ye! Enim Got ndi, i ku etpa, wi ropa titim wamp kᵾⱡ, enim pilik kai itᵾi! Jisas wu ei, nombuⱡa rung Wu Pris Kuimbal ei nga mbi paka rondpᵾn, mondᵾp pilpᵾn kᵾn, uⱡ kun kai mbᵾ tᵾp pena ila pindmin! 2 Unt Got ndi, Moses ei, wamp rᵾp itangga nitim uⱡ ei, rᵾk rᵾk pep ropa itim. Ei mel ku, Jisas elim nga kongun, Got ndi, ngurum ei, rᵾk rᵾk pep ropa itim ku. 3 Manga rukrᵾm wu ei nga mbi ei, oⱡa purum. Wote, manga elim nga mbi ei, mana purum. Uⱡ ei mel ku, Jisas nga mbi ei, oⱡa puⱡnga, Moses nga mbi ei, mana purum.

4 Manga mbᵾ pora, wamp ti ndi, moⱡpa rakrᵾm. Uⱡ ei mel ku, Got ndi, mel mbᵾ pora itim. 5 Moses ni, kindmant wu mel moⱡpa, Got nga nitim ik mbᵾ mel, pep ropa wamp mbᵾ kᵾn, kongun itim. Ni kᵾn, Got nga uⱡ wote etmba mel, Moses ndi, wamp mbᵾ unt kundpa nitim. 6 Wote Kraist, Got nga kangᵾm ngurum wu ei moⱡpa kᵾn, Got nga manga ila mormin wamp mbᵾ, rᵾp etᵾm. Wote, tᵾn ronduⱡ mundpᵾn, muⱡ kona timin nimbun mondᵾp pilim ndam, tᵾn Got nga manga ei mel muⱡmin.

Got Nga Wamp Mbᵾ Muⱡ Ting

7 Uⱡ ei nga, Muⱡnga Wingti ei ndi, nimba mel,

“Enim ndi, Got nga ik ei, akup ei kᵾn, kum tek pileing ndam, unt enim nga anda kouwᵾmᵾn mbᵾ, kona kui waka ila numan orunga ronduⱡ puⱡnga, Got tᵾk mbuⱡ nguk, oⱡa tᵾk kandrung ni mel, enim iti nᵾtᵾi! 9 Got ndi, nimba mel, ‘Pana 40 ila, na ndi, uⱡ i iti mbᵾ, enim nga anda kouwᵾmᵾn mbᵾ ndi kandᵾk kelik, na nga ronduⱡ ei kᵾnmin nᵾk, na oⱡa tᵾk kandrung.’ 10 Uⱡ mbᵾ mint etᵾng ila, na ndi, wamp mbᵾ kᵾn popᵾⱡ kuⱡᵾp kᵾn, wamp mbᵾ kundᵾp nᵾmp mel, ‘Enim nga numan ei ndi, na nga nombuⱡa mam kupa ei, wak rok mormin ei ka!’ nit. 11 Na popᵾⱡ kuⱡᵾp kᵾn, mi tep ik ei mel nit, ‘Wamp mbᵾ na nga muⱡ ti kona ila, rukrᵾng ui nᵾwing mon!’” nit.
12 Ei nga, na nga angmᵾn, enim kandᵾk rᵾp etᵾk kai mundᵾi! Wote wamp ti, mundmong ila numan kit pilpa moⱡpa, Got kont morum ei kᵾn, mondpa pili uⱡ ei, wak romba. 13 Wote, uⱡ ei mon, enim uⱡ kit mbᵾ ndi, tᵾpa tiki pondpa, ropa mana tangga, enim numan orunga ronduⱡ puⱡnga, uⱡ kit mbᵾ iti nᵾtᵾi! Enim ndi, wamp ti ndi, ti rᵾk rᵾk tᵾk rapᵾndᵾk itᵾi! Tᵾn nga ui ei, ‘Akup’ ya Buk Wingti ei ndi, tᵾn kundpa ninim. 14 Tᵾn Kraist kᵾn tenda ila mormin wamp kᵾⱡ, tᵾn nga mondpa pili ei, unt kuimp tepa, tep murmᵾn ni, ambuⱡpᵾn gi ndupᵾn mbun, tᵾn kuⱡmin ndam, uⱡ ei kapⱡa etmba. 15 Buk Wingti ei ndi, ei mel ninim,

“Akup enim Got nga ik ei, piling ndam, enim unt numan orunga ronduⱡ puⱡnga, tᵾk mbuⱡ ngᵾk, Got kᵾn tᵾk, roi ndurᵾng ei mel iti nᵾtᵾi!” nitim.
16 Unt wamp namin mat ndi, Got nga ik nitim mbᵾ, tᵾk roi ndurᵾng? Moses ndi, Isrel wamp Isip kona ila, tᵾpa mepa ekit urum wamp mbᵾ pora ndi, ik tᵾk roi ndurᵾng. 17 Got ndi, wamp namin kᵾn, popᵾⱡ mondᵾⱡ nga pana 40 omba purum. Uⱡ kit etᵾng wamp mbᵾ kᵾn, popᵾⱡ kuⱡnga, kona kui waka ila kolk ketᵾng. 18 Got ndi, wamp namin mat kᵾn, nimba mᵾi ropa, na nga wamp muⱡ tᵾtmin kona ila, rukᵾr pi nᵾpeing mon nitim. Elim nga ik tᵾk roi ndurᵾng wamp kᵾⱡ kᵾn mint nitim. 19 Uⱡ ei nga, akup tᵾn pᵾnmᵾn, Got mondᵾk pili napᵾtᵾng wamp kᵾⱡ, Got elim nga wamp muⱡ ti kona ila, rukᵾr pi nᵾping.